Esti llibrín rescata una amuesa de los versos escritos por Charo Pandiello. Son trece composiciones que, anque nun pue dicise que cumpla perfectamente los cánones de l'Academia de la Llingua, tán escrites nel asturianu de Charo, esto ye, un asturianu de tradición oral, col qu'ella siempres pudo comunicase dende la so infancia riosellano-parraguesa hasta'l so maduror centroasturianu. Atoparán nestos versos enforma de lo qu'ella ye, una muyer fuerte al par que sensible, cariñosa, desprendida y amiga de los sos amigos. Van atopar equí tamién esi toque costumbrista que'arreglaba les sos perdíes comedies, nes que nun falten pizques de sutil ironía.